اعراض الاكتئاب وعلاجة

الفرق بين الحزن والأكتئاب

 

الأكتئاب أعراضه وطرق علاجه

 

كتير منا بيتعرض لحالة من الحزن أو الغضب أو العزلة ومش بنعرف نسمي اللي بنمر بيه ده أيه, وأزاي نتخلص من الحالة دي, وبيحصل لنا لخبطة كبيرة فى مشاعرنا

ممكن تقعد ساعات أو أيام وممكن تمتد لشهور وأحنا مش عارفين نعيش حياتنا, ويفضل كلام الناس هو المسيطر على عقلنا وأننا قد أيه مش قريبين من ربنا كفاية ومش أقوياء عشان نواجه.

طيب تعالوا نعرف الأول يعني أيه أكتئاب:

الأكتئاب

هو خلل فى كيميا المخ (أضطراب عقلي) بيحصل فى أي سن ولأي جنس وبيغير من سلوك الأنسان وتفكيره ونظرته للأمور.

الحزن

حالة بتصيب الأنسان نتيجة أحداث الحياة من فقدان عزيز بالموت أو السفر أو التعرض لمشكلة أو البطالة أو الطلاق أو أي حدث يسبب ألم نفسي

لكن ممكن العياط أو الفضفضة مع حد أو الخروج للبحر او الجناين الحالة تتحسن, ولو بمرور الوقت حالة الشخص النفسية أتحسنت يبقى كان ده كله حزن وده أمر طبيعي كلنا بنمر بيه.

أما أذا مر أكتر من أسبوعين على حالة الحزن دي فلازم ننتبه لأننا بكده داخلين على أكتئاب.

أعراض الأكتئاب

يأس, أحباط, عزلة, أضطرابات فى النوم, عدم الأهتمام بأي شىء كان مهم قبل كده, التفكير التشاؤمي والسلبي, أهمال العمل وبيصاحب الأكتئاب الوسواس القهري وتكون فكرة الموت اللي خلاص قرب هى الفكرة المسيطرة بالأضافة للخوف من أقل الأشياء واللي بتكون أوقات الخوف من حاجات غير منطقية زي الخوف من ركوب أي وسيلة مواصلات أو الجلوس مع شخص فترة أزيد من نص ساعة, ملازمة السرير وعدم تركه ألا للحمام, الشىء الصعب بجد هو وصول بعض الأشخاص للتفكير الجدي فى الأنتحار وللأسف نجاح بعضهم فى ده.

ده غير الأعراض الجسمية زي ألالام المفاصل والعضلات, صداع, غثيان, ألم حاد بالمعدة, أرهاق, همدان, فقدان أو زيادة الوزن, ألم فى الصدر, ضيق فى التنفس, عدم الرغبة فى العلاقة الحميمة.

طبعا لازم ناخد فى الأعتبار أن الأعراض اللي فاتت ممكن تكون دلائل لمرض غير الأكتئاب.

ولازم ننبه أن الأعراض دي لو فضلت لأكتر من أسبوعين لازم أطلب مساعدة دكتور لا عيب ولا حرام ولا هى وصمة عار.

ربنا خلق كل واحد فينا بقدرات معينة مش موجودة عند غيره, يعني اللي أقدر أتحمله غيري ميقدرش, عشان كدة المرض النفسي وخصوصا الأكتئاب مش دليل ضعف الشخصية أو التدين لأنها ببساطة قدرات وطاقات.

مثلا لو واحد أتولد ب4 صوابع هل له ذنب فى كدة؟ لأطبعا وبالتالي مريض الأكتئاب ملوش ذنب فى مرضه ومش مجرد فسحة أو تغيير أماكن أو أشخاص ممكن يخففه لأنه فى حالته دي محتاج لأدوية تشتغل على كيميا المخ اللي غصب عنه أصابها خلل.

العلاج

العلاج بينقسم لشقين:

نفسي: عن طريق جلسات تعديل السلوك والعلاج السلوكي المعرفي اللي بيعرفنا طرق التفكير السليم وأزاي نعرف نحل أي مشكلة أو أزمة بتمر بينا من غير ما تسيب أثر سيء فى النفس

دوائي: عن طريق مضادات الأكتئاب دون الدخول فى الأسم العلمي لها وطريقة عملها فى الجسم ألا أنها بأختصار بتساعد على تحسين مزاج المكتئب وتخليه يمارس حياته مرة تانية, أقل مدة للعلاج بتكون 6 شهور وممكن تمتدد لسنين حسب الحالة اللي بأذن الله بتشفى.

وعشان أكون صادقة معاكم أي أدوية على وجه الأرضلها أثار جانبية, ومضادات الأكتئاب على قد نفعها ألا أن بعضها ممكن يزيد الوزن لانه بيساعد على فتح الشهية وخصوصا السكريات, والنوم بعمق زيادة عن اللازم وعدم التركيز وبطء الأستجابة .

وطبعا مع تقدم العلم هنلاقي أدوية نسبة الأثار الجانبية فيها منخفضة جدا.

وفى نهاية كلامي أحب أوجه رجاي للمحيطين بالمكتئب, لو سمحتم فيه حاجات لازم تتجنبوا فعلها وهى:

  • بلاش (أيه يا عم دي مشكلة هايفة اللي أنت عامل عليها قضية أمال لو كانت مشكلة تستاهل كنت عملت أيه).
  • بلاش (أخرج أتفسح وغير جو وأنت تبقى زي الفل).
  • بلاش (أرجع لربنا وصلي وأنت هتبقى كويس).
  • بلاش (دكتور أيه اللي هتروحله هو أنت فيك أيه كلها يومين وتبقى تمام).
  • بلاش (الأدوية دي هتتعود عليها ومش هتعرف تبطلها دي زي المخدرات, أنت متعلم خليت أيه للجهلة).

أرجوكم رفقا بكل من أصابه الأكتئاب محدش نفسه يعيش بالعذاب ده وزي ما قلنا قبل كدة فى حالات بتفكر فى الأنتحار وبتنجح من كتر اللي حاسة بيه ومن غير الدعم اللي المفروض تلاقيه.

وأخيرا ربنا يشفى كل مريض بالأكتئاب ويتجاوز المرض اللعين ده ويرجع فرد منتج وكله حيوية وتفاؤل.

استمتعت بهذا المقال؟ كن على اطلاع من خلال الانضمام إلى النشرة الإخبارية لدينا!

التعليقات

يجب أن تكون مسجلا للدخول لتكتب تعليق.

مقالات ذات صلة
نوفمبر ٢, ٢٠١٩, ١:٥٠ ص - Imane
أكتوبر ٣١, ٢٠١٩, ٩:٢٤ ص - خديجة محمد
أكتوبر ٣١, ٢٠١٩, ٩:٢٢ ص - خديجة محمد
أكتوبر ٣٠, ٢٠١٩, ٧:٥٣ م - Imane
نبذة عن الكاتب