حكايات بنات من زمن فات

  1. حكايات بنات من زمن فات
  2. صدق اللي قال الصديق قبل الطريق
  3. في ابتدائي كان معايا بنت اسمها حنين.. في الحقيقة حنين مكانتش شاطرة خالص ، وعلي طول كانت تيجي متأخر ، ومكانش ليها صحاب ودايماً لوحدها ، ومفتكرش اني شوفتها بتضحك قبل كده.. 
  4. حنين كانت بتعمل شعرها ضفيرة ف كان بيبوظ شكله وبيبقي وحش رغم ان شعرها جميل .. 
  5.  
  6. مستر الانجلش كان بيحب يطلع اللي بيجيب درجة وحشة ويتريق عليه ، يعني مكانش بيضربهم عصايتين وخلاص.. لأ كان بيطلعهم يضحك عليهم الفصل كله.
  7.  
  8. حنين كانت كل شهر بتجيب درجة وحشة وبتطلع عشان الفصل كله يضحك عليها..
  9. كمان كانت اي مشكلة في الفصل مجهول صاحبها تلقائي كانت بتلبسها رغم انها ملهاش دعوة باللي حصل..
  10.  
  11. حنين كانت كل يوم بتقابل واقع مرير وكل شهر بتُستنزف معنوياً.. 
  12.  
  13. لحد ما في مرة والمستر مطلعها قدام الفصل يتريق عليها فيه بنت قامت وقالتله " حرام عليك يا مستر ، حنين بشوفها كل يوم في المرواح قاعدة لوحدها بتعيط " 
  14. المستر مسكتش وكمل تريقة عليها..
  15.  
  16. لما الحصة خلصت ،البنت ديه راحت قعدت مع حنين واتكلمت معاها ، ونزلت معاها الفُسحة ، وبقوا صحاب ودايماً بقينا نشوفهم مع بعض..
  17.  
  18. حنين لأول مرة اشوفها بتضحك.!! وبقت تيجي الطابور بدري ايدها ف ايد صاحبتها..
  19.  
  20. جت حصة الرسم والمِس طلبت مننا نرسم موضوع مُعين.. 
  21. حنين رسمت اجمل رسمة شوفتها لحد ممكن يرسمها في السن ده.. بس مكانتش في الموضوع اللي المِس طلبته!!
  22.  
  23. حنين كانت راسمة جنينة فيها ورد وكان فيه كرسي كبير من بتاع الجناين ده.. قاعد عليه بنتين ، واحدة سايبة شعرها والتانية عامله ضفيرة..
  24. البنت اللي عامله ضفيرة بتعيط والبنت التانية حاطه ايد عليها والايد التانية ماسكة دبدوب قريب منها كأنها بتلاعبها.!!
  25.  
  26. المِس انبهرت بالرسمة وقالتلها "انتي شاطرة اوي يا حنين، انتي اللي رسمتيها.!! "
  27. قالتلها "ايوه انا رسمتها، وعبير لونتها"
  28. بقي كل حصة حنين بترسم وعبير بتلون.. 
  29.  
  30. حنين كانت صاحبة اجمل رسومات في الفصل ومع الوقت بقت رسوماتها اجمل.! 
  31. جه امتحان الانجلش بتاع الشهر حنين نقصت درجة واحدة وكانت الاولي علي الفصل!! 
  32. طبعاً المستر مش مصدق ازاي ده حصل! 
  33. مسبهاش وفضل يقولها انتي غشيتي وازاي جبتي المجموع ده .. و فجأة في وسط عتابه لحنين الفصل كله لا ارادياً قام سقفلها..
  34. حنين وقتها ضحكت وقامت حضنت عبير صاحبتها..
  35. المستر طلع شوكولاتاية واداها ليها عشان يصالحها ..خدتها منه وبعد الحصة قسمتها مع عبير.. 
  36.  
  37. حنين وهي مروحة اليوم ده فكت شعرها، وسرحته زي عبير صاحبتها وقد ايه شعرها كان جميل.. وخرجوا هما الاتنين من المدرسة وهما ايديهم في ايد بعض..
  38.  
  39.  حنين طلعت الاولي علي المدرسة.!! 
  40.  
  41. عبير.. كانت كل اللي احتاجته حنين عشان ترجع لحياتها.. 
  42.  
  43. الصُحاب لو اخترتهم صح هتنجح في حياتك وهتنجح في شغلك وعلاقاتك الاجتماعية ودراستك.. 
  44.  
  45. صاحبك هو ضهر ليك مش ضغط عليك، هو اللي يقف جنبك وقت ماتكون لوحدك ، صاحبك لو كويس هيخليك أحسن منه..
  46.  
  47. صاحبك هيخليك تعيش الحياة مش مجرد فترة تقضيها..  هيقدر ينقلك من عالم لعالم تاني..
  48. بس انت اختار ، اختار صح.

Nanis Cash

استمتعت بهذا المقال؟ كن على اطلاع من خلال الانضمام إلى النشرة الإخبارية لدينا!

التعليقات

يجب أن تكون مسجلا للدخول لتكتب تعليق.

مقالات ذات صلة
مايو ٢١, ٢٠٢٠, ١٢:٤٣ ص - ElGamal
مايو ١٦, ٢٠٢٠, ١٠:٤٩ ص - ايمان احمد عبد الرحمن
مايو ١٥, ٢٠٢٠, ٩:١٧ ص - hassan
مايو ١٥, ٢٠٢٠, ٩:١٦ ص - ayoub ait said
نبذة عن الكاتب