نبذه مختصره عن حياة الرسول للأطفال

 

فالبدايه حبايبي لازم نعرف الرسول عليه الصلاة والسلام اتولد امتي،،،رسولنا الحبيب اتولد يوم الاتنين 12 ربيع الأول في عام اسمه عام الفيل،،واليوم ده كان اسعد يوم تطلع فيه الشمس، ،واللي سمى الرسول باسم ،،محمد،،،كان جده عبد المطلب،،فهو اسمه محمد بن عبد الله بن عبد المطلب
كانوا زمان بيخلوا الطفل يتربي في الباديه عشان يتغذى كويس وتكون لغته قويه وسليمه ..فبدأو  يدوروا علي واحده تهتم بالرسول اول مااتولد وفعلا لقوا سيده عايشه فالباديه وهي كانت مرضعة الرسول واسمها حليمه السعديه،،
حليمه السعديه كانت فقيره وكان  عندها أغنام،،،،، والاغنام دي اللي هي المعيز والخرفان ياحبايبي ،،،كانت الأغنام دي ضعيفه جدا ولبنها قليل لكن لما سيدنا محمد اعد مع السيده حليمه بقت غنيه و الأغنام دي بقت قويه ولبنها بقه كتير ببركة وجود الرسول فالمكان ده

الرسول صلى الله عليه وسلم  كبر في حياه بسيطه وكان بيرعي الغنم،،،،يعني كان بيهتم بيهم ويأكلهم ويشربهم ،،لما كبر شويه رجع لأمه السيده آمنه وجده عبد المطلب

السيده آمنه ام الرسول ماتت وهو عنده 6 سنين ومات جده عبد المطلب وهو 8 سنين واخده واهتم بيه عمه أبو طالب وكان عمه بيحبه جدا جدا

كبر سيدنا محمد ولكنه مكانش بيعبد التماثيل ذي باقي الناس من حواليه ومكانش بيعمل ذنوب أو أي حاجه مش كويسه وكانت أخلاقه كويسه وكان امين جدا لدرجة ان الناس سمته الصادق الأمين

من ضمن صفات الرسول صلى الله عليه وسلم أن كانت كل الناس بتحبه وكمان كان بيصل رحمه ،،،انتوا عارفين حبايبي بيصل رحمه يعني ايه؟  يعني كان بيحب يزور قرايبه ويطمن عليهم ،،وكمان كان بيشتغل  في الرعي ذي ماقولنا من شويه وهو صغير لكن لما كبر بقه يشتغل فالتجاره

في مكه كانت فيه سيده من اشرف سيدات مكه وكان عندهاتجاره كتيره ،،،السيده دي اسمها السيده خديجة، ،،اتجوزها الرسول وهو عنده 25 سنه وكان مسؤول عن التجاره بتاعتها وكان امين جدا علي فلوسها
كانت أول زوجه له هي السيده خديجة وخلف منها كل أولاده معادا،،،ابراهيم


وصل الرسول صلى الله عليه وسلم لسن الأربعين وبدأ  يحس انه عاوز يبعد عن الناس ويقعد لوحده فكان بيخرج من مكه  لحد مايشوف البيوت بقت بعيده جدا ،،وكان بيفضل قاعد لوحده في مكان اسمه غار حراء ايام كتير بيتأمل في الكون وبيتعبد

وفيوم من الأيام ظهرله ملاك كبير الملاك ده كان سيدنا جبريل، ،،الرسول خاف لأن اول مره يشوف حاجه ذي كدا،،

وراح بسرعه بيته عند السيده خديجة وحكلها وهو خايف من الملاك اللي شافه في غار حراء
السيده خديجة طبعا صدقته لأن الرسول عمره ماكان بيكدب
وبعتت لابن عمها ورقه ابن نوفل تحكيله عن اللي سيدنا محمد شافه،،،وكان رد ورقه ابن نوفل
أن سيدنا محمد هو النبي المنتظر بس للاسف اهله فمكه هايرفضوا انه يكون نبي وممكن كمان يعملوا فيه حاجات وحشه

اول السيدات اللي صدقت كلام الرسول كانت زوجته السيده خديجة أما اول الرجال فكان سيدنا أبو بكر الصديق وأول الأطفال وكان عمره ساعتها 10 سنين سيدنا علي ابن أبي طالب

بدأ الرسول يتكلم عن الإسلام بس فالسر ياحبايبي عشان قريش متأذيش اي حد يصدقه ويكون مسلم،،،فضل يتكلم في السر لمدة تلات سنين، ،،وانا اقصد بكلمة السر دي يعني كان بيتكلم مع الناس بصوت واطي جدا جوا البيت وكان بينبه علي الناس اللي معاه مايحكوش الكلام اللي  كان بيقوله غير مع الناس اللي بيثقوا فيهم بس

بعد مافات التلات سنين أمر الله الرسول انه يبدأ يتكلم عن الإسلام بس مش في السر
وفعلا سيدنا محمد استجاب لكلام ربنا جمع الناس وطلع علي جبل اسمه جبل الصفا
وبدأ يقول للناس بصوت عالي أن ربنا خلاه نبي وبدأ يتكلم عن الإسلام
غضب جدا عمه ابي لهب من كلام سيدنا محمد وبدأ يقوله احنا مش هانعبدغير الاصنام،،،
انتوا عارفين ياحبايبي أن فيه سوره فالقرآن فيها ايه بتقول تبت يدا ابي لهب وتب،،لان ربنا كان غضبان منه  لأنه كان بيأذي الرسول

بعد مااتكلم الرسول عن الإسلام وان الاصنام دي مجرد حجاره مش بتأذينا ولا بتنفعنا، ،ماينفعش نعبدها لازم نعبد ربنا اللي خلقنا،،،بدأت قريش تضايق انه بيتكلم كدا عن الاصنام اللي هما كانوا بيعبدوها وللاسف بدأوا يأذوا الرسول كانوا اوقات يقولوا له ألفاظ وحشه انه هو كاذب أو مجنون وكمان كانوا بيحطوا شوك فضهره وكمان وهو بيصلي بيرموا عليه القاذورات ،،،وكمان أذوا أصحاب الرسول بالضرب والتعذيب ،،

لما الرسول شاف أصحابه بيتعذبوا جامد كدا أمرهم بالسفر لمكان اسمه الحبشة عند ملك عادل جدا اسمه النجاشي وكان عددهم 83 شخص

ابتدا الرسول يحارب الناس الوحشه اللي بتكره الإسلام وكان بينتصر عليهم ومن ضمن الحروب دي كانت غزوة بدر وغزوة أحد وغزوات  غيرها كتير ،،وبدأ الإسلام يبقي في أماكن كتير وناس كتير بقت مسلمه

وفي سنة 11 للهجرة في شهر ربيع توفي الرسول صلى الله عليه وسلم وكان عنده 63 سنه
مات النبي الحبيب لكن دينا الإسلام حي لايموت

اتمني حبايبي تكون القصه الصغيره دي عن حياة الرسول استفدتوا منها وعجبتكوا ولو حابين احكيلكوا  قصص تاني عن الرسول ياريت تعرفوني
يلا بينا نصلي علي الحبيب ،،

استمتعت بهذا المقال؟ كن على اطلاع من خلال الانضمام إلى النشرة الإخبارية لدينا!

التعليقات

يجب أن تكون مسجلا للدخول لتكتب تعليق.

مقالات ذات صلة
نوفمبر ١٨, ٢٠١٩, ٧:٢٥ م - ايمان احمد عبد الرحمن
نوفمبر ٥, ٢٠١٩, ٣:٥٣ م - سامية علي توفيق علي
نوفمبر ٥, ٢٠١٩, ١٢:٢٦ ص - ربيعة الإبراهيمي
نوفمبر ٥, ٢٠١٩, ١٢:٢٣ ص - سامية علي توفيق علي
نوفمبر ٢, ٢٠١٩, ١:٤٩ ص - سامية علي توفيق علي
نبذة عن الكاتب